电影《消失的她》
领跑“端午档”
6月27日
据猫眼专业版数据，
上映6天嘅《消失的她》
总票房已经突破9亿元
对于电影嘅评价、话题
係好多样化的
有的网友形容电影结束后
放映厅现场“男默女泪”
直言“呢部係恐婚教育片”
再次引爆婚姻话题讨论
有的网友疯狂玩梗
到处宣传呢部电影係
“绝世大甜剧”
仲建议情侣一起去睇
睇到悬疑片变甜剧
知情网友都觉得好离谱
主演朱一龙亦开玩笑话
“咁样宣传够嗮悬疑”
事关剧情真係唔多甜噶
Color同你剧透一下先~
剧情由一桩老婆失踪案讲起
饰演老公“何非”嘅朱一龙
发现老婆“李木子”突然消失
点知当地警察迟迟唔立案调查
佢喺警局发嗮烂渣
最后仲被赶出去了
求助冇门嘅佢连夜卖醉
点知一觉瞓醒
发现身边居然多咗个人
吓到佢好似“撞鬼”咁弹起床
床边瞓住个着高叉红裙嘅靓女
呢个由文咏珊扮演嘅女人
坚持话“自己係何非老婆”
但何非就坚持话
“呢个唔係自己老婆”
双方各执一词
何非陷入自证危机
佢逐渐变得狂躁暴怒
何非当众扯开“李木子”条裙
为咗验证佢大肶上有冇一块疤
在无旁人在场嘅时候
“李木子”自己用酒瓶“爆头”
逼到何非爆发
发癫咁撵住李木子条颈
俾冲入来嘅人怀疑
何非有神经病同暴力倾向
……
所有迹象同证据
都对何非不利
当金牌律师陈麦（倪妮）
好英气咁骑住摩托
突然出现喺何非面前时
何非好似捉到“救命稻草”
啦啦声向陈麦求助
但喺陈麦嘅逼问中
疑问一个个浮出
真相就好似定时炸弹咁
落喺唔同人嘅头上
係“假老婆”同犯罪集团合伙诈骗？
定係老公何非有“妄想症”？
亦或係“真老婆”嘅故意报复？
真相同答案就留畀大家
去电影院亲自揾啦
除咗谜团重重嘅剧情之下
极具吸引力嘅仲有
呢次部片演员嘅表现
朱一龙饰演嘅何非
係个复杂多面嘅角色
身世平凡但又好大野心
为咗丰满角色形象
朱一龙添加咗好多细节
让表演更细腻
其中体现精神疾病嘅
面部抽搐动作
真实程度更係受到
医学生嘅赞同
文咏珊呢次表现亦相当亮眼
一改往日温柔形象
大波浪、红唇、吊带裙
出演媚态十足嘅“疯批美人”
特别係喺沙滩上
同朱一龙嘅对手戏
擘大无辜嘅双眼
讲最狠毒嘅说话
满面笑容时又暗藏心机
俾何非撵住颈时
青筋暴起面部狰狞
真係好似快要窒息
令观众都跟住忘记呼吸
呢次令人印象深刻的演出
让文咏珊再次受到关注
唔熟悉佢嘅网友都问
“文咏珊早几年都干嘛去了”
另外，电影团队从宣发开始
就故意隐藏咗个演员
连演员名都冇打出嚟
只放出一身白裙嘅背影
直到上映后
呢位“消失嘅演员”终于露面
原来係剧中扮演真老婆
“李木子”嘅黄子琪
作为梦中同回忆中嘅角色
黄子琪就像纯洁嘅白月光
每次出现都有朦胧嘅氛围感
呢部片嘅讨论度咁高
仲係因为网友不断挖出
电影嘅隐藏细节
！下方内容涉及剧透 !
介意嘅唔好继续睇哈~
喺电影入面
老婆李木子最钟意画家梵高
从宣传海报到电影画面
都充满咗梵高嘅画作元素
何非经常去嘅酒馆
布局就致敬
梵高嘅《夜间咖啡馆》
何非举证假老婆嘅关键证据之一
係老婆木子买嘅书
书嘅封面係梵高嘅《桑树》
仲有网友挖出
梵高画作仲暗示
整部电影嘅剧情走向
夫妻关系嘅重要转折点
就发生喺一片麦田中
嗰个场景同预示梵高死亡嘅
画作《麦田群鸦》好相似
而梵高最有名嘅画作《星空》
由头到尾多次出现串成线索
喺最后竟然出现喺“作案现场”
男女主一起来到“海底星空”
女主最后头发喺水中散开
形成咗画作中嘅树影
喺陈思诚嘅悬疑电影中
都有多次出现“诡异笑容”
每次都吓到观众打冷震
例如《唐人街探案》中
张子枫嘅笑容
今次嘅《消失的她》中
关于笑嘅讨论度亦都好高
喺预告片中
文咏珊一抹诡异笑容
让悬疑氛围拉满
而在电影结尾
朱一龙“最后一笑”嘅镜头
也引起不小讨论
网友纷纷做起“阅读理解”
朱一龙解释话
“最后一笑其实係
何非对自己嘅嘲讽”
喺做完一切后
竟然落得如此下场
佢都觉得自己非常可笑
片中最为惊悚嘅一幕
係朱一龙喺畸形秀现场
睇到失踪嘅老婆嘅场景
文咏珊仲扮演咗畸形秀演员
镜头在预告中一闪而过
但细思极恐嘅係
呢个场景係有真实原型嘅
虽然文咏珊解密
呢个镜头係用绿幕拍摄、
后期制作完成嘅效果
但仍然有好多观众被吓亲
陈思诚编剧嘅呢部片
故事原型原来就係
泰国杀妻案
案中嘅受害者带来观后感
告诫大家要慧眼识人
陈思诚呢次仲喺结尾
送咗个彩蛋俾大家
警醒大家
“一念天堂，一念地狱”
唔知道係唔係亦在警醒自己？
唔知有几多朋友
已经睇完部片了？
话《消失的她》係甜剧
大家觉得算唔算诈骗呢？
来源：微博、抖音、豆瓣、剧照等
编辑：黄译萱
审核：曾敏妍
签发：骆苹
扫描下方二维码订阅
【微店】可乐生活小店
【淘宝】羊晚生活馆
【邮政】中国邮政微邮局
▼
>>>
一次过get可乐报详细内容
羊城晚报报业集团旗下的粤语生活类报纸，广东省唯一一份粤语刊物。广州至潮至IN的吃喝玩乐，湾区潮流资讯风向，统统喺晒度！
官方靓仔可乐君（handsomecolor）
〖特别声明〗：本文内容仅供参考，不做权威认证，如若验证其真实性，请咨询相关权威专业人士。如有侵犯您的原创版权或者图片、等版权权利请告知 wzz#tom.com，我们将尽快删除相关内容。
微信扫一扫